Boeing land veilig ná vlieënier flou word

2013-02-01 13:25

Portland – Die medevlieënier van 'n Alaska Airlines-vliegtuig wat na Seattle onderweg was, moes Donderdagaand ‘n noodlanding in Portland maak ná die hoofvlieënier flou geraak het.

Die medevlieënier het veilig met Vlug 473 in Portland geland, het Paul McElroy, woordvoerder vir Alaska Airlines, gesê.

Die hoofvlieënier het glo flou geword “iewers oor Oregon,” het McElroy gesê. Hy het later weer bygekom en is aan boord die vliegtuig deur ‘n dokter behandel.

Hy is glo na ‘n hospitaal geneem, maar meer besonderhede oor sy toestand is nie beskikbaar nie.

Die Boeing 737-700 het 116 passasiers aan boord gehad sowel as vyf bemanningslede.

McElroy het bygevoeg dat die vlieënier al 28 jaar lank vir Alaska Airlines vlieg.

Die voorval volg ná ‘n ander vlieënier op 22 Januarie ook flou geword het tydens ‘n vlug.

McElroy het gesê die voorvalle hou nie met mekaar verband nie.

– Volg Nuus24 op Twitter

- Sapa - AP