Blogger blameer Rusland
2009-08-08 16:10
Tbilisi- ‘n Blogger bekend as "Cyxymu" het Rusland Saterdag blameer vir die reuse-kuberaanval wat miljoene internetgebruikers wêreldwyd verhoed het om webtuistes soos Twitter en Facebook te besoek.
Die blogger, wie se blog die teiken van die aanval was, het aan AFP gesê dat Rusland agter die aanval sit.
Die internet-sekuriteitsmaatskappy, F-Secure, het Vrydag bevestig dat Cyxymu die teiken van die aanval was.
Cyxymu se regte naam is Giorgi. Hy is ‘n dosent in ekonomie aan die Tbilisi Universiteit. “Dit sal baie geld kos om ‘n aanval van hierdie aard te loods. Daarom dink ek Rusland was betrokke,” het die 34-jarige blogger gesê.
Die man wou egter nie verduidelik waarom ‘n kuberaanval soveel geld kos nie en hy wou ook nie bekend maak waarom hy Rusland verdink van die daad nie.
“Ek is nie seker waarom ek die teiken van die aanval was nie. Maar dit is ‘n bewys dat ek besig is om iets baie belangrik te doen.”
Sosiale netwerke soos Twitter en Facebook was Donderdag en Vrydag tydelik geaffekteer deur die aanval.
Volgens ‘n woordvoerder van Facebook het hulle reeds die probleem geïdentifiseer en funksioneer meeste van hulle dienste weer soos normaal.
Hoe werk ‘n kuberaanval:
Dié soort aanval staan bekend as 'n ‘verspreide dienswyering’-aanval, oftewel DDos-aanval.
In sulke aanvalle word bedieners in so ’n mate deur nuttelose kommunikasie-aanvrae oorweldig dat die bedieners later net dié aanvrae beantwoord.
Die aanvalle word tipies vanaf reuse-informele netwerke gedoen. Sulke netwerke kan georganiseer of met behulp van virusse ondergronds geskep word.
Virusse word dan byvoorbeeld wêreldwyd versprei en op ’n gegewe tyd word almal wat aktief is op rekenaars ingespan om gelyk en deurlopend eenvoudige data van gekose teikens aan te vra.
Baie keer weet sulke gekompromitteerde rekenaars se base nie eens hul rekenaars word hiervoor ingespan nie.
Om ’n klein data-aanvraag ’n uur lank uit te stuur is niks spesiaals nie. Dit is egter spesiaal as sulke aanvrae gelyk van ’n paar miljoen rekenaars kom.
–Sapa, AFP, Beeld
- AFP