Bloedige kinkel in stryd teen premier
2010-03-17 07:16
Sapa-AFP
Bangkok. – “Ek het dit gedoen om die gees van die stryd van Thailand se mense teen ongeregtigheid te wys,” het Chuleeporn Ruangsinprasert (52) Dinsdag gesê terwyl ’n spuitnaald, gevul met haar bloed, in ’n bottel by dié van medestryders gevoeg is vir gebruik in ’n morsige tentoonstelling van politieke weerstand.
Dié afgetrede universiteitswerker het haar by duisende ander betogers aangesluit wat op groot skaal hul bloed geskenk het sodat dit by die hek van die premier se kantoor gestort kon word.
“Hierdie is spesiaal, dit kom uit my hart uit. Ek wil my bloed vir die samelewing gee sodat ons nie langer deur die elite beheer word wat al die mag het nie.”
Duisende ondersteuners van die populistiese gewese premier Thaksin Shinawatra, in rooi geklee, het van 08:00 in die tou gestaan om hul bloed in tente in Bangkok te skenk.
Met die weiering van die premier, Abhisit Vejjajiva, ’n dag vroeër om in te stem tot vervroegde verkiesings, het die Rooihemde gistermiddag hul plan aangekondig om bloed te stort.
Meer as 50 mediese vrywilligers het hand bygesit om bloed by elke betoger te trek, wat eindelik sou deel uitmaak van ’n versameling bloed van 1 000F.
“Dit maak so ’n bietjie seer, maar dis oukei. Ek doen dit vir ons kinders, vir demokrasie,” het die 61-jarige rysboer me. Kumpong Wongchompu gesê. Sy het 450 km ver gereis om aan die betoging deel te neem.
Thaksin se regering is in 2006 in ’n staatsgreep omvergewerp en hy het in ballingskap gaan bly om ’n tronkvonnis vir korrupsie vry te spring.
Sy ondersteuners sê sy bewind is op onwettige wyse beëindig. Hulle is al maande in ’n uitgerekte reeks betogings betrokke teen ’n opponerende veldtog wat Thaksin nie goedgesind is nie.
’n Paar skenkers het gegril en tranerig gelyk terwyl hulle bloed geskenk het.
“Ek is bang vir naalde en ek kan nie bloed aanskou nie, maar ek doen dit vir demokrasie. Ek is lief vir Thaksin en ek is lief vir die Rooihemde,” het ’n verkoopsman Samrit Ruttapab (34) gesê terwyl hy weggekyk het toe die naald in sy arm gesteek is.
Suda Rangkuporn (44), ’n professor in linguistiek aan Bangkok se Chulalongkorn Universiteit, meen die bloedskenkings het die spel verander in Thailand se verdeelde politieke toneel.
“Hierdie is ’n politieke innovasie,” het sy gesê.
“Bloed het meer betekenis as net kleur. Bloed is lewe en ons gee dit vir demokrasie. Ons is gereed om ons lewe te gee vir demokrasie.”
- Die Burger