Bloedige botsing in Filippyne eis 21

2013-02-04 09:39

Manila – ‘n Bloedige botsing tussen die Abu Sayyaf-rebellegroep en rebelle van die Moro National Liberation Front het Sondag die lewe van 21 vegters in die suide van die Filippyne geëis, het die polisie gesê.

‘n Bevelvoerder van die Moro National Liberation Front het gesê sy groep het Sondag met rebelle slaags geraak ná Abu Sayyaf geweier het om buitelandse gyselaars vry te laat wat al vir maande aangehou word.

Altesaam agt Moro-rebelle en 13 Abu Sayyaf-militante is in die botsing dood.

Dit was die eerste gewelddadige konfrontasie tussen dié twee rebellegroepe, wat jare lank na bewering saam ontvoerings beplan het, en saamgespan het teen die Filippynse regering.

Die Moro, wat onlangs 'n outonomie-ooreenkoms met die regering gesluit het, het die inisiatief geneem om self gyselaars te bevry om glo die land se beeld te probeer opbou.

– Volg Nuus24 op Twitter.
 

- Sapa - AP