Bin Laden se vroue, kinders kopseer vir Pakistan
2011-05-09 08:57
Islamabad – Amerikaanse ondersoekbeamptes fynkam tans ’n kosbare fonds rekenaardata en dokumente waarop in Osama bin Laden se huis beslag gelê is.
Intussen word die Pakistanse amptenare met ’n meer doodgewone taak gekonfronteer – wat om te doen met die doodgemaakte terreurleier se vroue en agt van sy kinders.
Pakistan se minister van buitelandse sake het Sondag gesê regeringsamptenare hou nog die vroue en kinders aan vir ondervraging en tot dusver het nog geen land hul uitlewering versoek nie.
Pakistan het Maandag toesig verkry oor Bin Laden se familielede nadat die Al-Kaïda-leier in ’n geheime Amerikaanse operasie in sy skuilplek in die noordwestelike stad Abbottabad doodgemaak is.
Onder hulle was Bin Laden se vrou, Amal Ahmed Abdoellfattah, wat in Jemen gebore is. Sy het Pakistanse amptenare vertel sy het in 2006 by die huis ingetrek en nooit die terrein verlaat nie.
’n Woordvoerder van Pakistan se buitelandse ministerie, Tahmina Janjoea, het gesê nie Jemen of enige ander land het die uitlewering van Bin Laden se familielede aangevra nie.
Pakistanse amptenare het nie onthul waar die familielede aangehou word nie, maar gesê hulle sal na hul land van herkoms teruggestuur word.
Die kinders se ouderdomme is nie bekend gemaak nie. Bin Laden het ’n vlugtelingslewe gelei, maar sy gesin pal naby hom gehou.
Een van sy seuns, Khalid, is in die aanval dood. Abdoellfattah, sy jongste vrou, is in die been gewond en na ’n militêre hospitaal geneem, het ’n Pakistanse militêre amptenaar gesê.
Een van sy dogters het toegekyk toe haar pa doodgemaak is. Abdoellfattah het glo vertel sy het sedert 2006 nooit die boonste verdiepings van die karig gemeubileerde huis verlaat nie. – Sapa-AP
- Die Burger