Betoging ná man hond doodsteek

2012-12-21 12:10

Bangkok – 'n Diereregtegroep in Thailand het Vrydag buite die Duitse ambassade in Bangkok betoog nadat 'n Duitser verlede maand 'n hond doodgesteek het.

Sowat 50 lede van Call for Animal Rights Thailand het buite die ambassade byeengekom om 'n waarskuwingsbrief aan die 65-jarige Gert Alfred Grewe te oorhandig. Grewe het vermoedelik 'n golden retriever doodgemaak nadat die hond verlede maand sy Rottweiler aangeval het.

Veena Jitassa, 'n woordvoerder van die groep, het gesê Grewe het glo die hond 17 keer gesteek en het gesê die organisasie wil hê hy moet 'n psigiatriese ondersoek ondergaan.

Grewe en die ambassade kon nie onmiddellik vir kommentaar bereik word nie.

Die media in Thailand het berig dat Grewe die golden retriever, genaamd QQ, op 12 November gesteek het toe hy en sy Rottweiler in Sattahip in suidoostelike Bangkok gaan stap het.

Grewe is 'n boete van 1 000 baht (sowat R279) opgelê. Hy het gedreig om die golden retriever se eienaar te dagvaar en skadevergoeding van 300 000 baht (sowat R83 000)  te eis vir beserings wat hy opgedoen het.

– Volg Nuus24 op Twitter