Betogers wil Griekeland tot stilstand ruk
2011-10-20 10:04
Athene – Betogers sê hulle gaan Griekeland op die tweede dag van ‘n algemene staking tot stilstand bring.
Daar word berig dat die regering later vandag oor die omstrede wetsontwerp sal stem. Daar word verwag dat die nuwe maatreëls die groen lig sal kry.
Honderde jeugdiges het Woensdag die strate van Athene ingevaar en talle winkels verniel en geplunder.
Owerhede sê 50 polisiebeamptes en drie betogers is tydens die gewelddadige onluste beseer. Altesaam 33 betogers is in hegtenis geneem.
Sky News berig meer as 100 000 mense het ‘n optog in die hoofstad teen die wetsontwerp gehou.
Die plan sluit onder andere belastingtoenames en salarisverminderings in.
Die wetsontwerp is Woensdagaand aanvanklik goedgekeur. Altesaam 154 parlementslede is ten gunste van die plan en 141 lede het daarteen gestem.
Parlementslede sal na verwagting later vandag weer stem.
George Papandreou, premier van Griekeland, het huiwerige parlementslede gemaan om die plan te steun.
Lees meer hier
Volg Nuus24 op Twitter