Betaal of sterf in dié staat
2013-02-08 14:07
Morelia – ‘n Mexikaanse burgemeester wat saam met sy vrou in ‘n restaurant ontbyt geëet het, is vroeër dié week doodgeskiet.
Wilfrido Flores Villa, tussentydse burgemeester van die dorp Nahutzen in Michoacan, is die 31ste burgemeester wat vermoor is sedert ‘n golf van dwelmverwante geweld in 2006 in die land uitgebreek het.
Intussen het ander burgemeesters in die westelike staat Michoacan
erken dat hulle dwelmkartelle betaal om hulle lewens te spaar.
“Die tekort aan sekuriteit raak ons. Dit is iets waarvan almal weet, maar niemand praat daaroor nie, want ons is bang om met georganiseerde misdaad gekonfronteer te word,” het een van vyf burgemeesters wat op voorwaarde van anonimiteit met AFP gepraat het, gesê.
“Ons moet ‘n belasting aan hulle betaal,” het hy gesê.
“Hulle gee jou nie ‘n keuse nie.”
Die bendes in Michoacan neem geld van armes en rykes. Inwoners moet glo betaal as hulle nie ontvoer of vermoor wil word nie.
“Dit is nie iets wat ons wil doen nie. Dit is iets wat ons gedwing word om te doen. Ons het nêrens om heen te vlug nie. Hulle gee nie vir jou ‘n opsie nie,” het die burgemeester gesê.
Bendelede loop onbeskaamd by stadsale in om hulle omkoopgeld af te haal. Dit beloop tipies sowat $800 (R7 134) per maand. Dié afpersing vind plaas onder die neuse van weermaglede, wat sedert 2006 ontplooi is om die geweld probeer verminder.
– Volg Nuus24 op Twitter
- Sapa - AFP
