Beslag gelê op honderde papegaaie

2011-01-25 21:00

Kampala - ‘n Beampte van wildlewe-owerhede in Uganda sê daar is in die afgelope maand op 270 African Gray-papegaaie beslag gelê wat onwettig gesmokkel is.

Volgens Johnson Masereka het die owerhede op 140 papegaaie beslag gelê tydens ‘n klopjag die afgelope naweek op ‘n onderneming wat wildlewe uitvoer se pakhuis naby Entebbe, die land se hoof-lughawe. Volgens Masereka beskik die maatskappy nie oor die regte dokumente om die papegaaie uit te voer nie.

Niemand is egter in hegtenis geneem nie.

Die klopjag is uitgevoer skaars twee weke nadat daar op 132 papegaaie beslag gelê is wat oor die grens by die Demokratiese Republiek van die Kongo ingesmokkel is.

Volgens Masereka probeer smokkelaars gewoonlik twee of drie papegaaie op ‘n slag uitvoer en nooit meer as 100 op ‘n slag nie. Hy sê African Gray-papegaaie kan in Europa tot R10 600 elk kos.

- Volg Nuus24 op Twitter
 

- Sapa - AP