Berugte Bulgaarse dwelmbaas buite hof geskiet

2013-01-29 14:51

Sofia –‘n Berugte Bulgaarse dwelmbaas is Dinsdag tydens ‘n skietery buite Sofia se hof gewond, het die polisie gesê.

Zlatomir Ivanov is op die trappe van die hofgebou in sentraal-Sofia geskiet terwyl hy deur die polisie na sy appèlverhoor vergesel is.

Ivanov, wat verlede Februarie tot agt jaar tronkstraf gevonnis omdat hy ‘n georganiseerde misdaadgroep gelei het wat by dwelmhandel betrokke was, is in sy been en nier gewond.

Hy is in 2003 deur die Centre for the Study of Democracy as een van die top-ses dwelmbase in die land uitgewys.

Hy sou Dinsdag appèl aanteken teen sy vonnis.

Beide Ivanov en sy lyfwag, wat terug geskiet het op die aanvaller en ook in die been gewond is, is gehospitaliseer en is in ‘n stabiele toestand, het hospitaalbronne gesê.

Kort ná die voorval het ‘n groot brand op die dak van ‘n gebou oorkant die hof uitgebreek. Die polisie sê ‘n skerpskutter het Ivanov waarskynlik van daar geteiken.

– Volg Nuus24 op Twitter

 

- AFP