Berlusconi wéér in omstredenheid gehul
2011-09-02 11:07
Napels – Silvio Berlusconi is gister opnuut in omstredenheid gedompel nadat ‘n sakeman wat in 2009 met ‘n prostitusie-saak verbind is, aangekeer is nadat hy na bewering die Italiaanse premier vir duisende euro afgepers het.
Giampaolo Tarantini, ‘n entrepreneur van die suide van Bari, en sy vrou, Angela Devenuto, is in hegtenis geneem nadat ondersoekers ontdek het Berlusconi het bykans ‘n half miljoen euro aan hom betaal.
‘n Lasbrief vir nog ‘n man, Valter Lavitola, wat volgens die vervolgingsgesag ‘n konsultant vir die verdediging- en ruimtevaartgroep, Finmeccanica is, is uitgereik.
Die in hegtenisnemings het die kollig opnuut op ‘n prostitusieskandaal wat in 2009 in die nuus was, geplaas toe die prostituut Patrizia D’Addario beweer het sy is betaal om partytjies by Berlusconi se woning in Rome by te woon.
Die nuwe aantygings kom in ‘n tyd wat Berlusconi se regering sukkel op ‘n gewysigde besnoeiingspakket vir die land af te handel om sodoende wêreldmarkte oor die stabiliteit van Italië se openbare finansies gerus te stel.
Napels se vervolgingsgesag het gesê die twee is ná ‘n breedvoerige ondersoek in hegtenis geneem.
“Daar is ernstige en konsekwente aanduidings van herhaalde kontantbetalings sowel as ander finansiële voordele wat Berlusconi aan die Tarantini-paartjie toegeken het,” het staatsaanklaers in Napels gesê.
Die betalings is met “versteekte of ondeursigtige metodes” gemaak, het ‘n verklaring gelui.
Berlusconi het geen kommentaar gelewer nie en was nie vanoggend by ‘n kabinetsvergadering teenwoordig nie.
– Volg Nuus24 op Twitter.
- Reuters