Berlusconi se politieke dae is getel
2011-11-09 07:04
Den Haag – Die kans is oorweldigend dat die politieke loopbaan van Silvio Berlusconi, Italiaanse premier, Woensdag tot ’n einde sal kom.
Dit is die gevolg van ’n stemming Dinsdagmiddag laat in die Italiaanse parlement. Die stemming het oor ’n roetinesaak gegaan – die 2010-begroting – maar die plan was dat dit met ’n formele mosie van wantroue opgevolg sou word.
Altesame 308 parlementslede het ten gunste van die goedkeuring van die begroting gestem en geeneen daarteen nie. Tog was dit ’n toets, want 321 lede het buite stemming gebly. Die premier het dus sy meerderheid verloor.
Nou is die pad oop vir ’n formele mosie van wantroue wat waarskynlik aanvaar sal word.
Die stemming volg op ’n oproep van Berlusconi se getrouste bondgenoot in die regerende koalisie, mnr. Umberto Bossi, dat hy moet bedank en plek maak vir iemand anders. Bossi is die leier van die Lega Nord, een van die groot partye wat Berlusconi tot dusver deur dik en dun gesteun het.
Onmiddellik ná die stemming het nóg ’n bondgenoot van Berlusconi, Pier Luigi Bersani, leier van die Demokratiese Party, eweneens gesê die premier moet nou bedank.
Dit was Dinsdag nog onbekend wie Berlusconi sou opvolg.
- Uit Athene word verneem dat die Griekse politieke leiers ná ure van onderhandelings eenstemmigheid bereik het dat Giorgios Papandreou met onmiddellike ingang as premier deur Lucas Papademos, gewese visepresident van die Europese Sentrale Bank, opgevolg word. Hy is veronderstel om tot die verkiesing in Februarie aan te bly, maar blykbaar wil hy langer in die amp wees, lui berigte in die Europese media.
– Volg Nuus24 op Twitter
- Die Burger