Berlusconi se bedrogsaak word hervat
2011-09-26 15:57
Milaan – ‘n Verhoor sal Maandag plaasvind in die bedrogsaak teen die Italiaanse eerste minister, Silvio Berlusconi, wat verband hou met sy media-maatskappy.
Dit was nie onmiddellik bekend of Berlusconi die verhoor, wat in Milaan sal plaasvind, gaan bywoon nie.
Aanklaers beweer dat Berlusconi en top-bestuur van sy privaat-uitsaaier Mediaset die prys wat betaal word om televisieregte via buitelandse maatskappye, wat deur Berlusconi beheer word, te bekom, verhoog het om sodoende ‘n kleiner inkomste te verklaar.
Berlusconi en sy mede-beskuldigdes ontken dat hulle enigiets verkeerd gedoen het.
Die verhoor – een van vier waarby Berlusconi tans betrek word – is verlede jaar uitgestel ná die instelling van ‘n wet wat sê die eerste minister kan hofverrigtinge vryspring vanweë sy take in die regering.
Nietemin het Italië se grondwethof in Januarie die wet gedeeltelik gelig.
– Volg Nuus24 op Twitter
- Sapa-DPA