Berlusconi se aanvaller sê jammer
2009-12-15 22:47
Rome - Die man wat die Italiaanse premier Silvio Berlusconi aangeval het, het om verskoning gevra vir sy "oppervlakkige, lafhartige en onbeheerde" aanval.
'n Regter moet nou besluit of die 42-jarige Massimo Tartaglia na 'n psigiatriese hospitaal oorgeplaas moet word.
Tartaglia het glo 'n geskiedenis van sielkundige probleme en het deur sy prokureurs 'n brief aan Berlusconi geskryf waarin hy om verskoning vra.
Berlusconi het in 'n boodskap uit sy hospitaalbed aan sy ondersteuners gesê "die liefde oorwin haat".
Dít was Berlusconi se eerste boodskap ná hy Sondag tydens 'n politieke saamtrek met 'n replika van Milaan se katedraal geslaan is.
Berlusconi het 'n gebreekte neus en het sy twee voortande verloor.
"Baie dankie aan almal wat boodskappe van bemoediging en ondersteuning gestuur het. Bly kalm en gelukkig. Die liefde oorwin altyd haat en jaloesie," het hy gesê.
Dokters het gesê Berlusconi sal na verwagting Woensdag ontslaan word.
– Sapa-AFP