Berlusconi maak verskyning by seksverhoor

2012-04-20 15:01

Milaan – Silvio Berlusconi het Vrydag 'n buitengewone verskyning by sy verhoor in Milaan gemaak.

Die voormalige Italiaanse premier staan tereg op aanklagte dat hy seks met 'n minderjarige prostituut gehad het.
 
Een van die getuies wat die geleentheid wat Berlusconi na bewering by sy villa naby Milaan gehou het, bygewoon het, het vroeër verduidelik hoe ontkleedanseresse in non-uitrustings en voetbal-truie vir Berlusconi gedans het.

Imane Fadil het gesê Berlusconi het haar persoonlik $2 600 (sowat R20 000) in kontant betaal toe sy vir die eerste keer na een van sy partytjies genooi is. 

Op dié speisfieke aand het sy twee jong vroue in non-uitrustings gesien wat vir die 75-jarige Berlusconi gedans het.

Berlusconi word daarvan aangekla dat hy seks met die Marokkaanse nagklubdanser Karima El-Mahroug gehad het toe sy net 17 jaar oud was. Hy het glo ook sy mag misbruik deur die polisie te oortuig om haar vry te laat nadat sy tydens 'n ander voorval in hegtenis geneem is.

El-Mahroug, beter bekend onder haar verhoognaam “Ruby the Heart Stealer”, ontken dat sy seks met Berlusconi gehad het, terwyl hy op sy beurt ook alle aanklagte teen hom ontken.

Die voormalige premier het gesê hy het slegs "gesofistikeerde partytjies" gehou en het kontantbetalings gedoen om jong vroue wat hulp nodig het, te help.

Hy het nie voorheen van die hofsittings bygewoon nie.

– Volg Nuus24 op Twitter.

- Sapa - AFP