Bendeverkragting in Indië: Twee sal onskuldig pleit
2013-01-08 14:04
Nieu-Delhi – Twee van die vyf mans wat daarvan beskuldig word dat hulle verlede maand 'n 23-jarige vrou in 'n bewegende bus in Nieu-Delhi verkrag het, sal onskuldig pleit op al die aanklagte teen hulle, het 'n prokureur Dinsdag gesê.
"Hulle sal onskuldig pleit op al die aanklagte," het ML Sharma, wat Mukesh Singh en Akshay Thakur verteenwoordig, aan die nuusagentskap AFP gesê. "Daar is nog niks bewys nie."
Mukesh Singh, die broer van die busbestuurder, Ram Singh, en Thakur is twee van die vyf mans wat daarvan beskuldig word dat hulle die jong student op 16 Desember verkrag het. Hulle het haar daarna na bewering uit die bus gegooi en oor haar probeer ry. Die verkragting het 'n skerp reaksie in Indië en die res van die wêreld ontlok.
'n Sesde beskuldigde, wat 17 jaar oud is, sal na verwagting in 'n hof vir minderjariges verhoor word.
Amptenare by die Tihar-tronk, waar die beskuldigdes aangehou word, het bevestig dat Sharma Dinsdag met die twee mans vergader het.
Die polisie het vroeër aan verslaggewers gesê hulle het bloedmerke gevind wat die mans met die aanval verbind, maar die regsverteenwoordiger het gesê hy sal vrae opper oor die manier waarop die polisie die bewyse hanteer het.
Die mans sal weer op 10 Januarie in die hof verskyn.
– Volg Nuus24 op Twitter.
- Sapa - AFP
