Bendeverkragting: Verdediging vra hof om aanklagte terug te trek
2013-01-28 12:57
Nieu-Delhi – Die regsverteenwoordigers van die vyf mans wat aangekla is van die bendeverkragting en moord op ‘n 23-jarige student het Maandag hul openingsredes in ‘n spesiale hof in Nieu-Delhi gelewer.
Die voorverhoor het verlede week begin met aanklaers wat onder andere aanklagte van moord, verkragting, ontvoering en die vernietiging van bewyse teen die verdagtes gebring het.
Die verdediging sal “die hof vra om die meeste van die aanklagte terug te trek, insluitend moord, aangesien daar geen bewyse is nie,” het VK Anand, ‘n prokureur wat twee van die beskuldigdes verteenwoordig, voor die verrigtinge gesê.
“Selfs die nadoodse ondersoekverslag gee nie die oorsaak van haar dood nie,” het hy gesê.
Die hoofverhoor sal afskop wanneer die verdediging en aanklaers hul onderskeidelike argumente gemaak het en die hof die aanklagte gefinaliseer het.
‘n Raad sal ook Maandag besluit of ‘n sesde verdagte ‘n minderjarige is en of hy as ‘n volwassene verhoor moet word,” het plaaslike nuusberigte gelui.
Die slagoffer is op 16 Desember met ‘n ysterstaaf geslaan en in ‘n bewegende bus verkrag. Sy is twee weke later in ‘n hospitaal in Singapoer dood.
– Volg Nuus24 op Twitter
- Sapa-DPA
