Bendeverkragting: Minderjarige moet hang, sê slagoffer se pa

2013-01-29 08:17

Nieu-Delhi – Die pa van ‘n Indiese student wat dood is nadat sy deur ‘n groep mans op ‘n bus verkrag is, het gevra dat veranderings aan die wet gemaak word sodat ‘n minderjarige verdagte as ‘n volwassene verhoor kan word, het die plaaslike media Dinsdag berig.

Die pa van die 23-jarige slagoffer sê hy is geskok dat ‘n hof beslis het dat die sesde verdagte in die saak as ‘n minderjarige verhoor sal word. Hy sal tot ‘n maksimum van drie jaar tronkstraf gevonnis word indien hy skuldig bevind word.

“Ek wil die wetgewers vra of daar nie ‘n uitsondering in hierdie saak gemaak kan word nie,” het die pa, wie se naam vir wettige redes nie genoem mag word nie, aan The Hindu gesê.

“Ons wil deur die regering verseker word dat ons reg tot geregtigheid beskerm word. In hierdie geval skuil die beskuldigde agter wettige gapings in die stelsel,” het hy bygevoeg.

Die slagoffer se familie is onder diegene wat vra dat die minderjarige saam met die ander vyf beskuldigdes verhoor word. Hulle kan moontlik gehang word as hulle skuldig bevind word aan die aanklagte van moord en verkragting.

Regspanne het Maandag die skoolrekords van die tienerverdagte aanvaar. Hy is daarvolgens op 4 Junie 1995 gebore, wat beteken dat hy 17 jaar oud is.

– Volg Nuus24 op Twitter
 

- Sapa - AFP