Bendeverkragting: Formele aanklagte kom binnekort

2013-01-30 18:01

Indië – Vyf mans wat aangekla is van die bendeverkragting en moord op ‘n 23-jaroge student in Nieu-Delhi sal Saterdag formeel in die hof aangekla word, waarna hul verhoor sal begin, het ‘n prokureur gesê.

Die media is uit die hof verbied, wat beteken min besonderhede oor die verhoor sal bekendgemaak word.

Die saak het duisende betogers die strate in laat vaar en ‘n openbare debat oor die polisie en regering se versuim om geweld teen vroue in Indië te stuit het gevolg.

Die student is op 16 Desember met ‘n ysterpaal gemartel en op ‘n bewegende bus verkrag. Sy is saam met ‘n manlike vriend, wat ook aangeval is, vol bloed in ‘n straat gelaat. Sy is twee weke later in ‘n hospitaal in Singapoer dood.

Aanklaers sê hulle het ‘n groot lêer vol bewyse, insluitend DNS van bloedbevlekte klere, wat deur die polisie gevind is.

Die vyf beskuldigdes sal onskuldig pleit op aanklagte van verkragting en moord, het een van die prokureurs gesê.

Die verdediging het aan Reuters gesê hulle sal argumenteer dat die DNS-bewyse vervals is en minstens twee van die beskuldigdes sal sê hulle het bekentenisse afgelê nadat hulle in aanhouding gemartel is.

– Volg Nuus24 op Twitter
 

- Reuters