Bende wat Apple-produkte smokkel vasgetrek

2012-04-13 11:01

Hongkong – Grensamptenare in die suide van China het ‘n bende vasgetrek wat glo elektroniese toerusting ter waarde van $79 miljoen (R622 miljoen) van Hongkong gesmokkel het, lui 'n berig.

Die goedere – wat hoofsaaklik iPads, iPhones en iPods was – is glo deur die internet verkoop nadat dit van Hongkong af gesmokkel is en belasting van 20% vrygespring het, het die South China Morning Post berig.

Die polisie in die Chinese grensstad Shenzhen sê 104 verdagtes was betrokke in die saak en 68 is in hegtenis geneem vir hul betrokkenheid in die smokkel van meer as 100 000 items oor die afgelope jaar.

Onder Chinese doeaneregulasies kwalifiseer elektroniese toerusting, soos iPhones en iPads,  nie vir die belastingvrye status wat gegee word aan items wat vir persoonlike gebruik oor die grens geneem mag word nie.

Hierdie reglulasie is in die afgelope 18 maande strenger toegepas om handelaars vas te trek wat wins maak deur gesogte Apple-produkte te herverkoop nadat hulle dit goedkoper in Hongkong koop, waar daar geen belasting gevra word nie en die produkte vinniger op die mark kom.

– Volg Nuus24 op Twitter
 

- Sapa-DPA