Beloning aangebied vir moord op 'godslasteraar'

2012-09-22 20:02

Islamabad – 'n Pakistanse regeringsminister het Saterdag 'n beloning van $100 000 (sowat R830 000) aangebied vir die persoon wat die vervaardiger van 'n rolprent wat met Islam die spot dryf, vermoor.

"Ek kondig vandag aan dat hierdie godslasteraar wat die heilige profeet misbruik het... as iemand hom sal vermoor, sal ek daardie persoon 'n prys gee van $100 000," het Ghulam Ahmed Bilour, die land se minister van spoorweë, aan verslaggewers in die noordwestelike stad Peshawar gesê.

"Ek nooi ook Taliban- en Al-Kaïda-broers om vennote te wees in hierdie edele daad," het hy gesê.

Hy het bygevoeg dat hy die rolprent se vervaardiger self om die lewe sou bring as hy 'n kans gehad het, "en dan kan hulle my hang," het hy bygevoeg.

Dié uitlating volg 'n dag ná gewelddadige betogings oor die rolprent Innocence of Muslims in Pakistan 21 lewens geëis het.

– Volg Nuus24 op Twitter.

- AFP