Bejaardes sterf in brand by tehuis in Aus
2011-11-18 09:05
Sydney – Drie bejaarde mense is dood en agt ander het kritieke beserings opgedoen toe twee brande in ‘n tehuis uitgebreek het.
Volgens owerhede het die brande vroeg Vrydagoggend in aparte dele van die kompleks in Sydney ontstaan.
AP berig owerhede sal probeer vasstel of die voorval ‘n saak van brandstigting is.
Daar word berig dat altesaam 88 pasiënte – waarvan talle aan demensie ly – uit die enkelverdieping-gebou in die voorstad Quakers Hill ontruim is.
“Hierdie is ‘n nagmerrie vir ‘n brandweerman...” het Greg Mullins, ‘n brandkommissaris, gesê. Hy sê dis aaklig om by ‘n tehuis op te daag met “bejaarde mense wat nie hulself kan beskerm nie.”
Polisiebeamptes het bevestig dat drie pasiënte gesterf het.
Volgens supt. Ross Chivers is 29 mense na hospitale geneem vir rookinaseming en ligte brandwonde. Hy sê agt van dié pasiënte is in ‘n kritieke toestand.
Geen personeellede is in die voorval beseer nie.
Volg Nuus24 op Twitter
- Sapa - AP