Bejaarde wen Viëtnam lotery
2010-02-24 04:12
Hanoi – ‘n Arm 97-jarige man van Viëtnam het sowat $400 000 (R3 miljoen) in ‘n lotery gewen, het ‘n berig Dinsdag gesê.
Familielede was glo gretig om elkeen ‘n deel te kry van sy nuwe rykdom.
‘n Buurman en plaaslike amptenare van Ho Chi Minh moes intree om te verhoed dat die bejaarde sy geld weggee aan al die mense wat na sy huis gestroom het, het die koerant, Thanh Nien berig.
Dit wat oor is van die geld is in ‘n bankrekening geplaas, het die koerant verder berig.
Nguyen Van Het het die geld gewen ná hy met 100 000 dong (ongeveer R40) loterykaartjies gekoop het uit “gelukkige geld” wat hy vir die nuwe maanjaar ontvang het, het Thanh Nien gesê.
Klein pakkies “gelukkige geld” word tradisioneel in dié tyd uitgedeel.
Reuse-hoeveelheid geld
Thanh Nien het berig dat Het se prysgeld van 7,6 biljoen dong ‘n massiewe bedrag is in ‘n land waar die jaarlikse per capita inkomste sowat $1 000 (sowat R7 700) is.
Het en sy vrou het spesiale finansiële ondersteuning van die owerhede ontvang aangesien hulle onder die broodlyn geleef het, het ‘n amptenaar van die Fatherland Front gesê.
“Ons sal nog ‘n paar weke wag sodat hy kan kalmeer voordat ons hom vra wat hy met die geld wil doen,” het die amptenaar gesê.
- AFP