Bejaarde vrou en meisie ná 123 ure uit puin gered

2010-04-19 14:16

Kaapstad – ‘n Bejaarde vrou en ‘n vierjarige meisie is vyf dae ná die verwoestende aardbewing in China uit die puin gered.

Wujin Cuomao (68) en die jong Cairen Baji het vir meer as 123 ure onder die puin gelê toe reddingswerkers hul uiteindelik kon help.

Reddingswerkers het hulle in Jiegu onder ‘n gebou gekry wat verbrokkel het.

Volgens owerhede is minstens 1 944 mense dood, sowat 12 000 beseer en duisende haweloos.

Volgens The China News Service het geliefdes van die vrou en meisie hul lewendig gehou deur kos en water vir hulle deur gate in die puin te stuur.

Dit was nie duidelik of die vrou en meisie familie is nie.

- Sapa-AFP