Bejaarde vergiftig eksvrou
2009-08-28 14:38
Londen – ‘n Opgeskorte vonnis is aan ‘n Britse pensionaris toegedien nadat hy sy eksvrou oor ‘n periode van tyd met kwik vergiftig het.
Hy het elke keer as sy kom kuier het, kwik in haar tee gegooi “om haar aandag te probeer kry”.
William Dowling (69) het 350 dae opgeskorte vonnis ontvang en is vir 18 maande onder korrektiewe toesig geplaas.
Hy het aan die hof erken dat hy sy vrou van Januarie tot April “‘n giftige stof toegedien het om haar te krenk en te irriteer en om haar leed aan te doen”.
Sy vrou (64), wat simptome van vergeetagtigheid, slegte spysvertering en kopseer ervaar het, het volgens die hof “geen ernstige nagevolge van die kwik” getoon nie.
Die hof het aangehoor dat sy haar man van 28 jaar gelos het omdat sy “moeg was vir (sy) magshouding oor haar”.
Hy het haar tee met kwik gedokter elke keer as sy by hom gaan kuier het.
Dié oortreding kon hom tot vyf jaar in die tronk kos.
“Dit was nie net ‘n bose manier om jou vrou te behandel nie, dit was ook potensieel dodelik,” het die regter aan Dowling gesê.
“Gelukkig is jou plan ontdek voordat enige ernstige skade gedoen kon word.”
Die kwikvlakke wat in haar lyf opgetel is, is “nie hoër as wat oor die algemeen in mense gevind word nie” het die regter in sy uitspraak gesê.
- Sapa-dpa