Bejaarde Nazi's opnuut in soeklig
2011-12-08 08:02
Johannesburg – “Bloed sal vandag vloei.”
Dit was die woorde van ’n Nazi-eenheidsbevelvoerder tydens ’n slagting van 642 mense in die Franse dorpie Oradour-sur-Glane.
Dié voorval op 10 Junie 1944 is opnuut in die soeklig van die Duitse vervolgingsgesag.
Die huise van ses vermeende Nazi’s in Duitsland is dié week deurgesoek vir bewyse van hul beweerde betrokkenheid. Die verdagtes is almal 85 of 86 jaar oud.
Vroue en kinders is in ’n kerk ingejaag voordat gifgas daarin vrygelaat en dit aan die brand gesteek is. Mans is ook in skure doodgeskiet.
Die vervolgingsgesag ondersoek die slagting op grond van inligting van vroeëre ondersoeke in die voormalige Oos-Duitsland.
Andreas Brendel, Dortmundse staatsaanklaer wat die ondersoek lei, het in ’n onderhoud met die radiostasie WDR gesê geen bewyse is in die verdagtes se huise gekry nie, maar die ondersoek duur voort.
Volg Nuus24 op Twitter
- Beeld