Beiroet: 13 sterf, 20 vermis ná gebou ineenstort
2012-01-16 14:03
Beiroet - Minstens 13 mense is dood en 20 ander is moontlik vasgekeer in die puin van ‘n afgeleefde woonstelblok wat “soos ‘n aardbewing” in Beiroet inmekaar gestort het, het Libanese amptenare en ‘n getuie Maandag gesê.
“Ons het tot dusver 13 lyke gevind en ons vermoed dat sowat 20 slagoffers steeds onder die puin is” nadat die sesverdieping-gebou laat Sondag ineen gestort het, het genl. Raymond Khattar, hoof van burgerlike beskerming in Libanon, gesê.
“Ons hoop om oorlewendes te vind,” het hy bygevoeg.
Onder die lyke wat gevind is, was daar drie Libanese, en die res was Soedannese arbeiders.
Georges Kettaneh, ‘n amptenaar van die Rooi Kruis, het vroeër aan AFP gesê dat 12 mense ook beseer is toe die woonstelblok in die Ashrafiyeh-streek, in die ooste van Beiroet, inmekaar gestort het.
Volgens Khattar het sowat 50 mense in die gebou gewoon, insluitend baie arbeiders van Soedan en Egipte.
Minstens agt kon daarin slaag om die gebou te verlaat terwyl dit ineengestort het.
Onder die slagoffers was ‘n 15-jarige meisie. Haar ouma was onder die beseerdes. ‘n 73-jarige Libanese man, minstens twee Soedannese, ‘n Egiptenaar en een Filippyn het ook onder die beseerdes getel.
– Volg Nuus24 op Twitter
- Sapa - AFP