Bediende vas wat kind vermoor
2010-09-03 11:00
Kuala Lumpur – ‘n Indonesiese bediende wat gevlug het nadat sy daarvan aangekla is dat sy haar Maleisiese werkgewers se babaseuntjie vermoor het, is in hegtenis geneem nadat sy vir ‘n onderhoud vir ‘n nuwe werk gegaan het, het polisie Vrydag gesê.
Polisie was op soek na die 25-jarige vrou van Java nadat die 15-maand oue seun verlede week gesterf en ‘n nadoodse ondersoek op gemene spel gedui het.
Die vrou is in hegtenis geneem nadat sy ‘n familie in Kuala Lumpur genader het vir ‘n werk.
Hulle het haar herken van ‘n foto wat in die koerant geplaas was en het die polisie in kennis gestel.
“Sy het na een van die huise gegaan met ‘n plastieksak waarin klere was en het vir werk gevra,” het Abdul Jalil gesê.
“Sy het vir die familie gesê dat sy weggehardloop het van haar vorige werkgewers omdat sy nie meer vir hulle kon werk nie.”
“Die familie het opgelet dat sy baie soos die verdagte lyk wat deur polisie gesoek word in verband met die moord op ‘n baba en het ons in kennis gestel. Ons het na die huis gegaan en die vrou in hegtenis geneem,” het hy gesê.
Ná die dood van die seuntjie het die bediende glo haar werkgewer gekontak en vir hom gesê dat die kind siek geword het en bewusteloos was.
‘n Verslag van die nadoodse ondersoek het getoon dat die baba wurgmerke aan sy nek gehad het.
Hy het ook bloeding op die brein gehad, sowel as kneusmerke wat daarop dui dat hy geskop of op getrap is.
Volg Nuus24 op Twitter
- Sapa - AFP