Batman-skietery: Verdagte kan doodstraf kry

2012-07-23 20:38

Centennial – Die verdagte in een van die ergste aanvalle in die Amerikaanse geskiedenis sou Maandag in die hof verskyn terwyl aanklaers besluit of hulle vir die doodstraf gaan vra.

Die 24-jarige James Holmes word daarvan aangekla dat hy Vrydag 12 mense doodgeskiet en 58 ander in Aurora buite Denver gewond het tydens die première van die Batman-film The Dark Knight Rises.

Aanklaers sal na verwagting later in die week vra dat hy die doodstraf opgelê word, alhoewel kenners sê slegs een persoon is sedert 1976 in Colorado tereggestel, het ABC en plaaslike media berig.

Holmes sou glo deur ‘n ondergrondse tonnel van die tronk na die hof in Centennial geneem word, het die berigte gesê.

Ná sy verskyning het aanklaers drie dae om formele aanklagte teen hom te bring. Die verdagte sal dan ook pleit.

Volgens die polisie is daar geen twyfel dat Holmes die gru-dade gepleeg het nie. Hy het homself buite die fliek aan die polisie oorgegee.

– Volg Nuus24 op Twitter
 

- Sapa - AFP