Batman-skieter 'nie mal nie, net boos'
2012-09-21 14:15
Centennial, Colorado – James Holmes, die Amerikaanse student wat in Julie na bewering 12 mense doodgeskiet en 58 gewond het by 'n rolprentteater in Aurora, Colorado, het Donderdag weer in die hof verskyn.
Holmes het dié keer met 'n gewone bruin kapsel verskyn, pleks van die helder oranje haredos wat hy met sy vorige verskynings gehad het.
Hy het met dié verskyning meer reaksie getoon as voorheen, en het 'n paar keer geglimlag en rondgekyk na sy regsverteenwoordigers en joernaliste wat oor die saak verslag doen.
Hy het sy mond beweeg, maar nie gepraat nie.
Familielede glo egter Holmes se optrede is 'n poging deur dié voormalige student van die Universiteit van Colorado in Denver om voor te gee dat hy aan 'n geestesversteuring ly.
"Hy speel net toneel," het Greg Medek van Aurora, wie se dogter Micayla, 23, in die skietery dood is, gesê. "Ek dink nie hy's mal nie. Hy's net boos."
Holmes staan tereg op altesaam 152 aanklagte van onder meer moord en poging tot moord.
Hy het nog nie gepleit nie, en sal nie pleit tot ná die voorverhoor nie. Die voorverhoor, waar regsverteenwoordigers die bewyse ter ondersteuning van hulle argumente sal voorlê, begin eers op 13 November.
Intussen het aanklaers besluit om nie meer te probeer om toegang te verkry tot 'n notaboek wat na bewering deur die verdagte aan 'n sielkundige gestuur is nie.
Die notaboek, wat in die hof se besit is, bevat na bewering beskrywings van 'n gewelddadige aanval, maar kan nie in dié stadium as bewysstuk gebruik word nie omdat dit beperkings in terme van vertroulikheid van 'n pasiënt se inligting kan oortree.
Aanklaers fokus nou op 'n afdruk van 'n handpalm wat op een van die deure van die rolprentteater gevind is.
– Volg Nuus24 op Twitter.
- SAPA
