Batman-skieter 'het geestesversteuring'
2012-08-10 08:33
Colorado – Die man wat daarvan verdink word dat hy verlede maand 12 mense tydens 'n Batman-première doodgeskiet het, het glo 'n geestesversteuring, het sy prokureur gesê.
Hy het meer tyd gevra sodat sy kliënt se gesondheid gemonitor kan word.
James Holmes staan tereg op 12 aanklagte van moord in verband met die massamoord op 20 Julie in Aurora, Colorado.
Dan King, prokureur vir die verdediging, het staatsaanklaers ook uitgetrap omdat hulle nie al die verslae, foto's en ander bewyse van die misdaadtoneel oorhandig het nie.
"Ons kan nie begin om mnr. Holmes se geestesversteuring te monitor totdat ons nie alle inligting het nie," het King gesê.
Volgens owerhede het die 24-jarige Holmes by die vertoning van die rolprent The Dark Knight Rises ingebars en gesê hy is "The Joker", 'n karakter uit die rolprentreeks, waarna hy op fliekgangers losgebrand het.
Tien van die 58 mense wat tydens die aanval gewond is, is steeds in die hospitaal. Vier is in 'n kritieke toestand.
Holmes moet weer op 16 Augustus in die hof verskyn.
Staatsaanklaers het gesê 'n besluit of die doodstraf vir Holmes versoek gaan word sal nog 'n hele paar weke neem.
– Volg Nuus24 op Twitter.
- AFP
