Batman-skieter geskik om verhoor te word, sê hof

2013-01-11 12:06

Denver – Aanklagte teen James Holmes, die Amerikaanse student wat in Julie na bewering 12 mense doodgeskiet en 58 gewond het by 'n rolprentteater in Aurora, Colorado, sal Vrydag amptelik by die hof ingedien word ná die besluit geneem is dat hy geestelik geskik is om verhoor te word.

Die 25-jarige Holmes sal teregstaan op 166 aanklagte wat moord, poging tot moord en die besit van plofstof insluit.

Hy sal ook ‘n kans gegun word om te pleit.

Regter William Sylvester het Donderdag gesê Holmes sal op al die aanklagte teregstaan.

“Die hof beslis dat die beskuldigde vir al die aanklagte verhoor sal word,” het Sylvester in sy uitspraak geskryf.

Sylvester het ook bewerings dat Holmes geestelik ongeskik is om verhoor te word, verwerp.

“Die hof bevind dat daar rede is om te glo dat die beskuldigde die helderheid van verstand gehad het om die moord te pleeg na hy dit lank beplan het,” het Sylvester gesê.

Die vervolging het in die voorverhoor bewys dat Holmes die aanval lank vooruit beplan het.

Daar was glo foto’s op Holmes se foon van die rolprentteater en hy het ook tussen Mei en Julie 2012, 16 keer wapens en ammunisie gekoop.

– Volg Nuus24 op Twitter
 

- Sapa - AFP