Batman-skieter: Sielkundige weet vooraf van moordfantasie
2012-12-07 10:06
Los Angeles – ‘n Sielkundige wat die beweerde Batman-skieter James Holmes behandel het maande voor hy sy aanval in 'n bioskoop uitgevoer het, het ‘n aanbod van ‘n polisiebeampte geweier om hom aan te hou sodat sy geestestoestand ondersoek kan word.
Lynne Fenton, ‘n psigiater by die Universiteit van Colorado, het die polisie weke voor Holmes se skietvoorval in Julie gebel om haar kommer uit te spreek ná Holmes gesê het hy wil ‘n klomp mense doodmaak.
Holmes het 12 mense na bewering doodgeskiet en 58 gewond by 'n rolprentteater in Aurora, Colorado tydens die première van ‘n Batman-rolprent.
Fenton, wat Holmes behandel het, het bekommerd geraak toe hy op 11 Junie vir haar gesê het hy het 'n fantasie om “’n klomp mense dood te maak,” het die Denver Post berig.
Sy het ‘n agtergrondondersoek by die polisie aangevra, maar Holmes het geen kriminele rekord gehad nie.
‘n Kampus-polisiebeampte het Fenton gevra of Holmes vir 72 uur aangehou moet word vir ‘n sielkundige ondersoek, maar Fenton het die geleentheid van die hand gewys. Die kwessie is nooit weer opgevolg nie, deels omdat Holmes besig was om die universiteit te verlaat.
Holmes staan tereg op altesaam 152 aanklagte van onder meer moord en poging tot moord.
Hy kan die doodstraf opgelê word as hy skuldig bevind word.
– Volg Nuus24 op Twitter
- Sapa - AFP
