Bahrein: Polisie dryf betogers uit Pêrel-plein
2011-03-16 11:04
Manama – Twee mense is Woensdag dood nadat sekuriteitsmagte in Bahrein op teen-regeringsbetogers, wat 'n plein in die hoofstad Manama oorgeneem het, toegeslaan het.
Honderde polisiebeamptes het met bokhael en traangas op Manama, hoofstad van Bahrein, se Pêrel-plein losgebrand om betogers ten gunste van ‘n demokrasie uit te dryf, berig Sapa.
Die polisie het op die betogers toegesak nadat die koning van Bahrein ‘n drie maande lange noodtoestand verklaar het in ‘n poging om ‘n opstand in die land stop te sit.
Joernaliste van die Al Jazeera-nuuskanaal het berig dat polisie, wat deur militêre magte ondersteun word, die betogers van alle kante aangeval het.
Polisie het vroeg Dinsdagoggend in tenks, weermagvoertuie en busse by die plein opgedaag voor hulle op die Sjiïtiese Moslem-betogers toegesak het.
Die betogers kamp al vir sowat ‘n maand op die plein uit en eis politieke hervorming.
Van die betogers se tente is aan die brand gesteek en van die ontploffings is deur gasbottels waarmee hulle kos gemaak het, veroorsaak.
Die Salmaniya-hospitaal is volgens bronne deur soldate omring en niemand word toegelaat om die hospitaal binne te gaan nie.
Die gewondes word volgens die BBC by 'n nabygeleë moskee behandel.
Menseregtegroepe berig dat skerp ammunisie in sommige dele van Bahrein se hoofstad deur regeringsmagte gebruik word.
- Volg Nuus24 op Twitter.
- SAPA