Baba leef ná hy op treinspoor val
2009-10-08 11:35
Kolkata, Indië – ‘n Pasgebore baba is ongedeerd nadat hy in ‘n bewegende trein se toilet gebore is, en toe tot op die treinspoor geval het. Dié voorval word as ‘n wonderwerk beskryf.
Rinku Debu Ray (28) het Dinsdag skielik gekraam terwyl sy aan boord ‘n trein was, wat besig was om deur die staat van Wes Bengal te beweeg.
Volgens die koerante, Times of India en die Hindustan Times het Ray in die toilet geboorte geskenk. Die baba het toe deur die afvoerkanaal geval en op die spoor onder te lande gekom.
Ray het dadelik van die trein afgespring om haar baba te probeer red. Passasiers het gedink sy probeer selfmoord pleeg en het die trein tot stilstand gebring.
"Ons het van die trein afgeklim en vir my vrou begin soek. Ná ‘n uur het ons haar langs die spore gevind waar sy met die baba op haar skoot gesit het,” het Bhola Ray (33) gesê.
Ma en kind het weer terug op die trein geklim en is by die naaste stasie afgelaai waar dokters hulle albei in as gesond verklaar het.
In ‘n soortgelyke voorval is ‘n baba dogtertjie in Februarie 2008 te vroeg gebore en het ook deur die toilet tot op die treinspoor geval. Sy is twee uur later ongedeerd op die treinspoor gevind.
- Sapa-AFP