Baba dood toe dokters vuis slaan
2010-02-26 10:38
Brasilië – ’n Baba het tydens haar geboorte in 'n Brasiliaanse hospitaal gesterf toe die twee dokters wat by die geboorte betrokke was, mekaar na bewering met die vuis bygekom het.
Die mediese personeel wat by die voorval betrokke was, is in die pad gesteek, het die nuusagentskap, Agencia Estado berig.
Volgens die koerant, Folha de Sao Paulo, het die ma, Gislaine Santana (32), Donderdag begin kraam.
Die geboorte van die baba het egter ‘n keisersnee vereis. Dit is glo op daardie stadium dat daar ‘n bakleiery tussen die twee dokters uitgebreek het.
Brasiliaanse owerhede is besig om die voorval te ondersoek.
"Dit was ‘n groot bakleiery. Hulle het selfs op die grond rondgerol. My vrou het na hulle geroep en gesmeek om op te hou,” het Santana se man, Gilberto Melo Cabreira, gesê.
‘n Derde dokter het eers 90 minute later die teater binnegekom om die keisersnee te doen. Die vrou het toe egter reeds geboorte aan haar dooie babadogter geskenk.
“Ek wil niemand die skuld gee nie. Maar ek kan getuig dat my baba tot op die dag van haar geboorte in ‘n gesonde toestand was.”
-Sapa-AFP