Baba bring hoop in Turkse ramp
2011-10-26 09:04
Ercis – Twee dae ná die aardbewing in die suidooste van Turkye was daar Dinsdag ’n sprankie hoop hier nadat ’n twee weke oue baba lewend uit die arms van haar ma gered is.
Reddingswerkers het ure lank gegrawe om by die naakte baba, wat byna twee dae in ysige temperature oorleef het, uit te kom waar sy en familielede in die puin van hul woonstelgebou vasgekeer was.
Die ma het haar baba, Azra, teen haar bors vasgehou om haar te beskerm. Die baba se ouma was ook vasgekeer.
Die naam Azra beteken “help” in Hebreeus.
“Ek is so opgewonde. Wat kan ek sê. God help hulle,” het die ander ouma, Sevim Yigit, met trane van blydskap gesê.
Terwyl sy gepraat het, het ’n reddingswerkers vorentoe geleun en aan haar gesê: “Ons sal hulle binnekort uitkry.”
Die baba se tienerneef het gesê: “Ons wag al byna 48 uur. Ek hoop my ma en tannie word binnekort gered.”
Die skare wat op die toneel saamgedrom het, het hande geklap toe ’n reddingswerker van die puinhoop met die baba in sy arms in die rigting van ’n ambulans gestap het.
Verligte familielede het om die baba saamgedrom.
Volgens die Daily Mail is Azra se ma en ouma ure later gered. Die lot van die baba se pa, wat ook in die gebou was toe dit meegegee het, is onbekend.
Vroeër het reddingswerkers ’n swanger vrou en haar twee kinders asook ’n polisieman en sy vrou lewend uit hul verwoeste huise gered.
Amptenare het Dinsdag gesê die amptelike dodetal ná Sondag se aardbewing van 7,2-sterkte staan op 432, maar talle mense is nog onder die puin van geboue in stede en dorpe aan die noordoostekant van die Van-meer vasgekeer. Dié grootste meer in Turkye is naby die grens met Iran geleë.
Sowat 2 000 geboue in die hoofsaaklik Koerdiese gebied het ineengestort.
Die meeste verwoeste geboue is in Ercis, ’n dorp met sowat 100 000 inwoners.
Die kantoor van die Turkse premier, Tayyip Erdogan, het gesê sowat 1 350 mense is in die aardbewing beseer. – Reuters, AFP en Sapa-AP
Volg Nuus24 op Twitter
- Die Burger