‘BP het ekostelsel heeltemal vernietig’
2010-05-29 10:29
Elise Tempelhoff, Die Burger
Johannesburg - ’n Regssentrum wat hom beywer vir die bewaring van bedreigde spesies gaan die brandstofreus BP (British Petroleum) hof toe vat omdat die oliebesoedeling in die Golf van Mexiko die habitat van bedreigde spesies in die see en vleilande verwoes het.
The Southern Environment Law Center (SELC) het Donderdag met regstappe teen BP begin omdat die oliebesoedeling – wat steeds ná vyf weke uit die diepsee na die oppervlak borrel – die habitat van 32 bedreigde spesies vernietig het. Dit sluit in die spermwalvis en verskeie visspesies, asook seeskilpaaie.
Die SELC het in ’n verklaring gesê die chemikalieë wat BP in die rehabilitasieprojek gebruik ná die ontploffing van sy Deepwater Horizon-olieboor op 20 April steriliseer boonop die omgewing.
Volgens die SELC verbied die Amerikaanse omgewingswet die vernietiging van bedreigde spesies se habitat.
Mike Senatore, visepresident van Defenders of Wildlife, ’n nie-rege- ringsorganisasie wat sy gewig agter SELC ingegooi het, het gesê BP moet tot verantwoording geroep word vir die ernstige bedreiging wat sy oliebesoedeling inhou vir die voortbestaan van seeskilpaaie, walvisse, seevoëls en ander wild weens die Deepwater-Horizon-ramp.
“Dis nie net die olie wat steeds uit die diepsee stroom wat die wild se voortbestaan bedreig nie, maar die chemikalieë wat BP gebruik om die gebied te probeer rehabiliteer, is dodelik,” het Senatore gesê.
Catherine Wannemaker, ’n regsgeleerde by die SELC, het gesê hulle is bekommerd oor wat hulle by die kuslyn sien, “maar ons is nog meer bekommerd oor wat in die see, onder die oppervlak, gebeur. Hierdie is ’n onmeetbare ramp vir mens sowel as dier... BP het ’n hele ekostelsel verwoes en moet tot verantwoording geroep word.”
David Nicholas, BP se woordvoerder in Londen, het per e-pos aan Die Burger gesê hulle wil geen kommentaar op die regstappe lewer nie.
Reuters berig die Deepwater-Horizon-ramp is nou groter as die Exxon Valdez-olieramp van 1989 toe 250 000 vate olie uit ’n olietenkskip aan die kus van Alaska gestort is.
- Die Burger