BP-olieramp is grootste ooit, wys nuwe syfers
2010-08-04 07:22
Houston – BP het Dinsdag toerusting getoets wat die beskadigde olieput in die Golf van Mexiko permanent kan verseël.
Terwyl ingenieurs besig was om die laaste tegniese probleme uit te stryk voor die operasie, het hersiene syfers van die Amerikaanse regering getoon dat sowat 5 miljoen vate olie gelek het voor die gapende olieput in die middel van Julie voorlopig verseël is.
Dit maak dié oliestorting die wêreld se grootste ooit en verdwerg die Ixtoc-oliestorting in die Baai van Campeche in Mexiko in 1979. Die Ixtoc-olieput het 3 miljoen vate olie uitgespuit.
Die nuwe raming is nóg slegte nuus vir BP, wat ookdeur ’n ondersoek deur Amerikaanse sekuriteite-regulators in die gesig gestaar word oor werknemers wat onwettig winste gemaak het uit die oliestorting.
BP kan met $4 300 (R31 200) per vat beboet word as growwe nalatigheid bewys kan word. “Gegewe die nuwe syfers kan BP met $4,5 miljard (R32,7 miljard) beboet word as growwe nalatigheid nie bewys kan word nie, of tot $14 miljard (R101,8 miljard) as dit wel bewys kan word,” het ’n rolspeler gesê.
Die toetsing is vir ’n dag uitgestel weens ’n hidrouliese lekkasie. Die operasie sal opgevolg word deur die voltooiing van ’n noodput later vandeesmaand, waarna ’n “bottom kill”-operasie die olieput met modder en sement sal vul.
- Reuters