BBC-joernaliste staak oor afdankings
2011-08-01 18:25
Londen – Joernaliste by die BBC het met 'n tweede 24-uur-staking begin oor 'n rusie oor afdankings wat dreig om die uitsaaier se sterkste programdienste te ontwrig.
Lede van die nasionale unie vir joernaliste (NUJ) is woedend oor nagenoeg 100 mense hul werk by die BBC se wêrelddiens en monitor-afdeling gaan verloor in die BBC se pogings om uitgawes te sny.
Die wêrelddiens het in Januarie aangekondig dit gaan 650 poste sny ná die Britse regering gesê het hy gaan sy fondse aan die uitsaaier staak as deel van sy plan om uitgawes te sny. Die BBC het hierna aangekondig hy gaan 16% van sy begroting oor die volgende paar jaar sny.
Die werkers se staking op 15 Julie het veroorsaak dat die uitsaaers se hoofnuusprogram, "Today", 'n uur laat op Radio 4 begin het en die BBC TV se aktuele sake-program, "Newsnight", nooit gewys is nie.
Samesprekings tussen die twee groepe kon nie 'n oplossing bereik nie en 'n volgende vergadering word vir 11 Augustus beplan.
"Daar was nog absoluut geen betekenisvolle skuif van die BBC om die individuele joernaliste wat hul werk gaan verloor te help nie," het Stanistreet beweer.
'n BBC-woordvoerder het gesê: "Ons is teleurgesteld dat die NUJ beplan om te staak en ons vra ons gehore om verskoning vir enige ontwrigting wat dit aan ons dienste veroorsaak."
"Ons wil graag ons pogings voorsit om die noodsaaklike verpligte afdankings te verminder, maar die aantal poste wat ons moet sluit beteken ongelukkig dat 'n groot klomp mense wel afgedank gaan moet word," het die woordvoerder bygevoeg.
– Volg Nuus24 op Twitter.
- SAPA