Avonturier in Nieu-Seeland vermis
2011-09-01 17:00
Wellington – ‘n Duitse man wat op ‘n kajak- en visvanguitstappie by die Hawea-meer op die suidelike eiland van Nieu-Seeland was, het spoorloos verdwyn.
Dertig soekers het Donderdag die gebied en meer deursoek en geen teken van die 25-jarige man gevind nie.
Daar word berig dat niemand sedert die begin van die week van die man gehoor het nie. Hy het Maandag vir sy uitstappie na die 125 km lange meer vertrek.
Konst. Mike Johnston van die polisie se soek- en reddingspan in Wanaka – ‘n dorp naby die suidelike deel van die Hawea-meer – sê die reddingspoging sal Vrydagoggend vroeg voortduur.
Hy sê sterk winde het die soektog Donderdag kortgeknip.
Volgens Johnston is die man se kanse nie goed om lewend gevind te word nie.
Die man, wat sowat twee maande in Nieu-Seeland deurgebring het, se naam is nog nie bekend gemaak nie. Owerhede moet nog bevestig dat die man se familie in kennis gestel is.
Johnston sê al wat die polisie weet, is dat die man van die oostelike deel van Duitsland afkomstig is.
Volg Nuus24 op Twitter.
- Sapa-DPA