Australiese weermag in seksskandaal

2011-04-06 12:02

Sydney – Die Australiese weermag is deur nóg ‘n skandaal geruk nadat ‘n jong rekruut na bewering homself afgeneem het terwyl hy seks met ‘n vroulike kadet gehad het en die video via Skype met sy vriende gedeel het.

‘n Ongeïdentifiseerde 18-jarige vrou by die elite Australian Defence Force Academy het dié bewerings bekendgemaak. Dié akademie is Australië se vernaamste kollege vir rekrute in die weermag.

Sy het aan Ten Network gesê dat sy eers oor die voorval bewus geraak het toe sy deur die verdedigingsmag se ondersoekbeamptes gekontak is. Die ondersoekbeamptes is deur ‘n ander kadet in kennis gestel.

Die vrou beweer sy het nie geweet dat die man webkameras in die kamer opgestel het nie. Sy het ook nie geweet dat ses van sy vriende besig was om na die video te kyk nie.

Foto’s is ook geneem en het onder lede van die akademie gesirkuleer.

“Dit was asof my hele wêreld verpletter is,” het sy gesê.

Australië se weermag het oor die jare ‘n slegte reputasie opgebou. Hulle is veral bekend daarvoor om alkohol te misbruik. 

Volg Nuus24 op Twitter.
 

- AFP