Aussies gee varke nou H1N1
2009-08-19 12:48
Melbourne - ‘n Tweede varkplaas in Nieu-Suid-Wallis is sedert Julie vanjaar onder kwarantyn geplaas weens die omstrede H1N1-virus.
Die rede hiervoor is dat plaaswerkers wat die griepvirus gedurende Julie onder lede gehad het, die virus nou glo aan die varke oorgedra het.
Gesondheidskenners vrees dat die H1N1-virus wat die mens het in diere kan muteer en in ‘n dodeliker vorm weer terug oorgedra kan word aan die mens.
Owerhede het om sekuriteitsredes op die isolasie van die varke aangedring.
Volgens die regering is die meeste varke reeds gesond.
Joe Helper, Victoria se minister van landbou, het gesê toetse is gedoen en tekens van dié griep is bevestig nadat die eienaars van die plaas opgemerk het dat die diere nie wil vreet nie.
"Die geval hou egter nie ‘n gevaar vir die gesondheid van die mens in nie en nasionale en internasionale voedselowerhede het gesê varkpodukte is steeds veilig om te eet,” het hy gesê.
Daar is ongeveer 32,224 H1N1-gevalle in Australië aangemeld, waarvan 460 in die hospitaal opgeneem is en 100 pasiënte in die hoësorg-eenheid behandel word.
- Sapa-AFP