Aus-tiener vas oor sy glo seuns wou vergiftig

2012-10-08 07:00

Sydney – 'n Meisie (14) van Australië is Maandag aangekla van poging tot moord nadat sy na bewering probeer het om twee kinders te vergiftig, het die polisie gesê.

Die polisie in Queensland het in 'n verklaring gesê die meisie is aangekla nadat sy glo kos, wat 'n huishoudelike middel bevat, aan twee seuns (12 en 13 jaar oud) gegee het.

"Die polisie sal aanvoer dat die meisie probeer het om die twee kinders te vergiftig."

Die Australiese Uitsaaikorporasie (ABC) het berig dat die meisie die sjokolade-bruintjies aan die seuns gegee het, maar die polisie wou nie die berig bevestig nie.

Die seuns het nie genoeg van die chemiese middel ingeneem om siek te word nie, het ABC berig.

– Volg Nuus24 op Twitter

- AFP