Aus ondersoek moontlike terreur-komplotte
2012-09-12 13:40
Sydney – Die polisie in Australië het klopjagte op ‘n rits eiendomme in Melbourne uitgevoer oor beweerde terreur-komplotte, het berigte Woensdag gelui.
Die Australiese federale polisie en die polisie in Victoria wou nie die klopjagte bevestig nie, maar sê ondersoeke duur voort.
“Hierdie is ‘n voortdurende ondersoek,” het ‘n woordvoerder vir die Australiese federale polisie aan AFP gesê. Hy het bygevoeg dat dit ongepas sal wees om verder kommentaar te lewer.
The Age-koerant berig dat die klopjagte verbind word met die Al-Furqan- Islamitiese sentrum in Springvale.
Die koerant sê verdagtes wat in die klopjag geteiken is, is glo betrokke in die “oorweging en verkryging van inligting” oor terroriste-aktiwiteite, eerder as ‘n volskaalse terreurkomplot.
‘n Woordvoerder vir die Al-Furqan-sentrum, wat ‘n Islamitiese boekwinkel het en klasse sowel as jeugaktiwiteite bestuur, het aan die Australiese Associated Press gesê die polisie het om 06:00 daar opgedaag en het tot die aand by die sentrum gebly.
“Hulle wou niemand binne toelaat nie, hulle het dit net afgesper,” het die man, wat nie sy naam wou gee nie, gesê.
“Hulle het ‘n paar goed geneem en vir ons ‘n kwitansie gegee.
"Almal is verbaas, maar 'n mens het altyd die gevoel dat hierdie dinge kan gebeur," het hy gesê.
Australië het minstens vier terreurkomplotte sedert die aanvalle van 11 September 2001 in Amerika in die wiele gery. Altesaam 37 uit die 38 mense wat vervolg is, was Australiese burgers.
– Volg Nuus24 op Twitter
- Sapa - AFP
