Aus: Gay mans in 1ste wettige troue
2009-11-25 15:48
Sydney, Australië – Twee verheugde mans het Woensdag Australië se eerste homoseksuele paartjie geword om wettiglik in die huwelik te tree.
Warren McGaw en Chris Rumble het gesê hulle voel geëerd.
"Gelukkiger as dit kan ons nie wees nie."
“Ons wou hierdie geleentheid aangryp, nie net vir homoseksuele paartjies in Australië nie, maar ook vir menseregte,” het McGaw gesê.
“Ek dink baie Australiërs staan agter ons.”
McGaw en Rumble se troue volg die goedkeuring in die Australian Capital Territory-gebied van Nieu-Suid Wallis van wette wat homoseksuele huwelike wettig maak.
Die nasionale regering van Australië oorweeg egter regstappe om die wette nietig te verklaar.
“Die realiteit is dat daar baie mense in die gemeenskappe is wat baie sterk oor albei kante van die saak voel,” het Robert McClelland, die land se prokureur-generaal, gesê.
Volgens McGaw en Rumble sal hulle platgeslaan wees indien die wet uitgegooi word, ten spyte van versekerings dat huwelike, wat reeds bevestig is, erken sal word.
Die regerende party het in Augustus gestem om Australië se verbod op homoseksuele huwelike te behou, maar die regering het ook wetgewing geskep om diskriminasie teen homoseksuele paartjie te bekamp.
- Sapa