Ateïs, sekte takel mekaar by optog
2012-03-16 12:07
Washington – Die omstrede Westboro-Baptistekerk, 'n ekstreme Kalvinistiese sekte, is al berug vir sy betogings by onder meer gay optogte en selfs die begrafnisse van Amerikaanse soldate – maar dié groep se jongste protesaksie beloof om selfs meer spanningbelaaid as gewoonlik te wees.
Die groep, wat gekant is teen onder andere gay regte en wat gereeld plakkate gebruik met slagspreuke soos "God haat Amerika," sal na verwagting by die sogenaamde Reason Rally, 'n byeenkoms vir ateïste, betoog – maar dié keer sal hulle te staan kom teen 'n teenstander uit eie geledere.
Msnbc.com berig dat een van die sprekers by dié geleentheid Nate Phelps, een van die 13 kinders van die leier van die Westboro-groep, pastoor Fred Phelps, sal wees.
Phelps jnr, wat die familie verlaat het toe hy 18 was, is 'n self-verklaarde ateïs en voorstander van gay regte.
Hy het al van tevore aangevoer dat sy pa sy kinders "in die naam van God" mishandel en sy "kerk" gebruik as 'n manier om sy woede uit te druk.
Phelps sal saam met bekendes soos die skrywer Richard Dawkins, die Mythbusters-televisiereeks se Adam Savage en die komediant Eddie Izzard by die byeenkoms optree.
"Nate Phelps bring 'n kragtige stem en storie na hierdie byeenkoms," het David Silverman, organiseerder van die Reason Rally, gesê.
"Hy wys as jy uit dáárdie familie kan kom as 'n ateïs, is dit enige plek moontlik."
– Lees hier meer.
– Volg Nuus24 op Twitter.
