Assange 'sou nie regverdige verhoor kry'

2012-08-16 21:55

Londen – Julian Assange sou deur Amerika en ander lande vervolg word, het Ricardo Patino, Ecuador se minister van buitelandse sake, gesê.
Hy het ook die besluit om asiel aan die WikiLeaks-stigter toe te staan, regverdig.

Indien Assange vanaf Swede na Amerika uitgelewer moes word "sou hy nie 'n regverdige verhoor gekry het nie; hy sou voor 'n militêre of spesiale verhoor moes verskyn," het Patino aan verslaggewers in Quito gesê.

Patino het gesê daar is vrese dat Assange se menseregte dalk geskend kan word, het die BBC berig.

Hy het die Verenigde Koninkryk daarvan beskuldig dat hulle 'n "openlike dreigement" gemaak het om hul ambassade te bestorm en Assange in hegtenis te neem.

Assange (41) woon al sedert 19 Junie in Ecuador se ambassade in Londen om uitlewering aan Swede te vermy, waar hy deur die polisie ondervra gaan word oor beweerde seksuele misdrywe.

– Volg Nuus24 op Twitter.

- Sapa-DPA