Assad gekap oor toespraak
2013-01-07 12:34
Damaskus – ‘n Toespraak deur pres. Bashar al-Assad waarin hy volgehou het dat Sirië op sy eie manier vrede sal vind, is skerp deur die Siriese opposisie en die internasionale gemeenskap gekritiseer.
Net Sirië se bondgenoot, Iran, het Maandag die toespraak ondersteun.
Assad se plan is “uit voeling met die werklikheid,” het ‘n Amerikaanse woordvoerder gesê, terwyl Brittanje die toespraak as “niksseggend” afgemaak het.
Catherine Ashton, ‘n verteenwoordiger van die Europese Unie, het in ‘n verklaring gesê die EU voel steeds dat Assad moet bedank om ‘n politieke oorgang in die land toe te laat.
Mohamed Morsi, president van Egipte, het aan CNN gesê sy land sal enige besluit van die Siriese burgery om Assad voor die Internasionale Strafhof vir oorlogsmisdade te verhoor, ondersteun.
Net Iran, wat geld, militêre raadgewers en, volgens die VSA, wapens aan Assad se regime verskaf, het sy gewig agter sy bondgenoot gegooi.
“Die Islamitiese burgers ondersteun pres. Bashar al-Assad se inisiatief vir 'n omvattende oplossing vir die land se krisis, wat nie buitelandse inmenging toelaat nie,” het Ali Akbar Salehi, Iran se minister van buitelandse sake, gesê.
Assad het Sondag in ‘n seldsame televisietoespraak gesê die land se opposisiegroepe is “vyande van God en marionette van die Weste.”
Die Verenigde Nasies sê meer as 60 000 mense het reeds gesterf sedert die opstande in die land in Maart 2011 begin het.
– Volg Nuus24 op Twitter
- Sapa - AFP
