Arizona-skieter sit lewenslank

2012-11-09 09:22

Los Angeles – Die jong man wat verlede jaar Gabrielle Giffords, ‘n Amerikaanse kongreslid, by ‘n politieke saamtrek in Arizona in die kop geskiet het, is sewe lewenslange vonnisse en nóg 140 jaar agter tralies opgelê.

Jared Lee Loughner (24) het vroeër vanjaar op die aanklagte teen hom skuldig gepleit, in ‘n ooreenkoms om die doodstraf vry te spring.

“Hy sal nooit weer die geleentheid kry om ‘n vuurwapen op te tel nie,” het regter Larry Burns gesê toe hy die massamoordenaar gevonnis het.

Giffords was Loughner se aanvanklike teiken. Sy is in die kop getref, maar het die aanval oorleef.

Ses mense is op 8 Januarie 2011 buite ‘n winkel in Tucson doodgeskiet en 13 ander, insluitende Giffords, is gewond.

Volg Nuus24 op Twitter 

- AFP